سوال: السلام علیکم ورحمۃ اللہ وبرکاتہ

بھائی امید ہے کہ مزاج بخیر ہوں گے۔ سوال یہ ہے کہ سال کے پہلے دن مبارک کہنا درست ہے یا نہیں؟ ڈاکٹر رفعت نواب، فیصل آباد

جواب: وعلیکم السلام ورحمتہ اللہ برکاتہ بھائی۔ الحمد للہ ہم خیریت سے ہیں۔ مبارک کہنے میں دین میں کوئی پابندی نہیں ہے خواہ ہیپی برتھ ڈے پر کہیں یا یکم جنوری پر یا کسی اور دن پر۔ مبارک ایک ویلکم کی نوعیت کی ہے اور اس میں اللہ تعالی سے دعا ہی ہوتی ہے کہ یااللہ! اس سال میں عنایات فرماتے رہیں۔ اس میں کوئی بھی اعتراض نہیں بن سکتا ہے۔

روایتی علماء اس پر تنقید کرتے ہیں کہ یہ مبارک کرنی ہے تو پھر ہجری کیلنڈر پر کریں اور عیسوی کیلنڈر پر نہ کریں کہ یہ عیسائیوں کا کیلنڈر ہے۔ اس کا جواب ہے کہ ہجری کیلنڈر پر بھی یہ دعا کریں اور عیسوی کیلنڈر پر بھی۔ ہمارا ہجری کیلنڈر حج اور رمضان کے لحاظ سے چلتا ہے۔ عیسوی کیلنڈر بھی ہمارا ہی ہے کہ یہ حضرت عیسی علیہ الصلوۃ والسلام سے شروع ہوتا ہے جو ہمارے ہی نبی ہیں۔

جنوری، فروری، مارچ کے کیلنڈر کی نوعیت موسم سے ہے۔ یہ سلسلہ رومن بادشاہ نے کیا تھا اور یہ رومی سلطنت 700 قبل مسیح کے زمانے میں شروع ہوئی تھی۔ وہ اسی طرح چلاتے رہے لیکن جب رومی بادشاہ کانسٹنٹائن حضرت عیسی علیہ الصلوۃ والسلام پر ایمان لائے تو انہوں نے کیلنڈر کو حضرت عیسی علیہ الصلوۃ والسلام سے شروع کروا دیا جو آج تک جاری ہے۔

شمسی کیلنڈر انسانوں نے موسم کے لحاظ سے ایجاد کیا تھا کیونکہ موسم سے ہی کھیت باغ چلانا زیادہ معقول محسوس ہوا اور اس زمانے میں ایگریکلچر اکنامکس ہی چلتی تھی۔ باکل ایسا ہی بکرمی دیسی کیلنڈر انڈیا میں موسم کے لحاظ سے ہی چلا ہے۔ رومی کیلنڈر یورپ کے موسم سے چلا ہے اور بکرمی کیلنڈر انڈیا کے موسم سے چلا ہے۔

دین میں اللہ تعالی نے عبادت بالخصوص روزہ اور حج کو چاند کے کیلنڈر سے چلایا ہے۔ اس کی وجہ یہی لاجیکل سامنے آتی ہے کہ انسانوں کو سردی اور گرمی دونوں میں ہی عبادت کرنی چاہیے کہ یہی انسان پر امتحان ہے کہ گرمی، سردی اور دیگر موسم میں بھی اللہ تعالی سے عبادت کرنا چاہیے۔ اس لیے ہر انسان کو کبھی گرمی اور کبھی سردی میں بھی روزہ کا موقع مل جاتا ہے۔

قبیلہ قریش نے ایک بدعت کی تھی کہ انہوں نے حج کو شمسی کیلنڈر میں بنایا تھا کیونکہ وہ چاہتے تھے کہ حج اسی موسم میں آئے جس میں کٹائی ہوتی جائے اور اہل قریش کو زیادہ نذرانہ ملتا جائے۔ اللہ تعالی نے قرآن مجید میں اس پر تنقید فرمائی ہے اور یہ بتایا ہے کہ اللہ تعالی کو مختلف موسم میں عبادت درکار ہے۔ اس پر آیت سورۃ التوبہ میں ہے۔ اس سے ہمارے لیے سبق یہی ہے کہ کیسی حرکتیں نہ کریں کہ ہم دین کو اپنے مفاد پرستی میں استعمال کریں تو ہم پھر منافق بن سکتے ہیں۔ ارشاد ہے۔

إِنَّمَا النَّسِيءُ زِيَادَةٌ فِي الْكُفْرِ ۖ يُضَلُّ بِهِ الَّذِينَ كَفَرُوا يُحِلُّونَهُ عَامًا وَيُحَرِّمُونَهُ عَامًا لِيُوَاطِئُوا عِدَّةَ مَا حَرَّمَ اللَّهُ فَيُحِلُّوا مَا حَرَّمَ اللَّهُ ۚ زُيِّنَ لَهُمْ سُوءُ أَعْمَالِهِمْ ۗ وَاللَّهُ لَا يَهْدِي الْقَوْمَ الْكَافِرِينَ۔

(حقیقت یہ ہے کہ) مہینوں کی تبدیلیاں کرنا اِن کے کفر ہی میں ایک اضافہ ہے جس سے یہ منکرین گمراہی میں مبتلا کیے جاتے ہیں۔ کسی سال یہ حرام مہینے کو حلال بنا لیتے ہیں اور کسی سال اسے حرام بنا دیتے ہیں تاکہ اللہ تعالی کے حرام کیے ہوئے مہینوں کی گنتی پوری کرکے اللہ تعالی کے حرام کیے ہوئے کو (اپنے لیے) حلال بنا لیں۔ اِن کے برے اعمال اِن کے لیے خوش نما بنا دیے گئے ہیں۔ اللہ تعالی کا فیصلہ ہے کہ اِس طرح کے منکرلوگوں کو وہ راہ یاب نہیں کرے گا۔ (التوبہ 9:37)

ہمارے ہاں اعتراض یہی ہے کہ نیو ایئر نائٹ میں جو فحاشی حرکتیں کرتے ہیں۔ اسی طرح مذہبی لوگ دین کو مفاد پرستی میں استعمال کرتے ہیں۔ ہمیں ایسی حرکتوں سے بچنا چاہیے تاکہ ہم فحاشی، شرک اور بدعت سے بچ سکیں۔

والسلام

محمد مبشر نذیر

اسلامی کتب کے مطالعے اور دینی کورسز کے لئے وزٹ کیجئے اور جو سوالات ہوں تو بلاتکلف ای میل کر دیجیے گا۔

www.mubashirnazir.org and mubashirnazir100@gmail.com